¿Querémoslos de Mareo y arguyosos de Xixón?

Ye fácil cantar «los queremos de Mareo» cuando un guaḥe entra nel campu, da un pase de gol y acaba siendo ún de los destacaos. Les comparaciones son odioses nestos casos. Los debuts y primeros partíos de Cote, Nacho Cases o Jony son casos únicos qu'enxamás podemos usar pa mete-y presión a un canteranu. Tamos falando de xugadores que dexaron buelga en Xixón, y eso namás lo consigue poca xente.

Ye muncho más difícil cuando esi mesmu guaḥe pierde un balón, nun-y salen les coses o tien que xugar nún partíu complicáu.

Y equí ye onde apaez una contradicción que deberíamos mirar de frente.

Queremos que Mareo siga siendo una fábrica de futbolistes, pero esiximos a los que salen d’ellí que se comporten como futbolistes fechos dende'l primer día.

Un rapaz que llega al primer equipu nun dexa de ser un rapaz porque se ponga la camiseta del Sporting. Sigue teniendo que crecer, deprender y equivocase. Y nun ye lo mesmo equivocase xugando nel filial que facelo nel Molinón, cola presión de miles de persones mirando.

Esa presión ye parte del fútbol profesional, claro que sí. Nun se trata de regalar puestos nin de pensar que por ser de Mareo hai que xugar siempres. La camiseta del Sporting hai que ganala nel campu, pero tampoco podemos pidir cantera, identidá y sentimientu de pertenencia si, cuando llega'l momentu de dar una oportunidá a un guaḥe, el segundu fallu conviértese nun xuiciu.

Porque si queremos que los nuestros tengan un sitiu, tamién tenemos que querer el procesu que fai falta pa que se conviertan nos futbolistes que queremos que seyan.

El domingu'l Sporting xugó de mano con 2 xugadores con dorsal de filial (Cuenca ente ellos) y saltaron al prau otros 3 (Iker, Conde y Mata). Amás, Duñabeitia y Manu Rodriguez (indiscutibles pal míster), l'añu pasáu nun pertenecíen al fútbol profesional. Esti perfil de xugador ye'l que siempres tenemos ehí cuando les circunstancies lo requieren, y ye la nuesa responsabilidá apoyalu pa que llogre la so mejor versión.

Mareo nun ye una fábrica de productos terminaos. Ye una escuela, y una escuela necesita tiempu.

Quiciabes deberíemos facer alcordanza d'esto cuando volvamos cantar aquello de «los queremos de Mareo y arguyosos de Xixón». Porque esa frase tien muncho más significáu que sacar once futbolistes de la cantera. Significa confiar nel trabayu que se fai ellí. Significa dar oportunidaes. Y significa, sobre too, entender que los errores formen parte del camín.

Queda demostrao que la camiseta roxiblanca pesa. Podemos entruga-ylo a los que fixeron la "mili" un añu, fueron quién a soltar les cadenes y mostraron la so meyor versión. En Burgos tovía tán naguando por esi Gaspi. O podemos tamién falar con otros que la lleven a cuestes y tovía nun son quién a cargar con ella, como Pablo Garcia, el propiu Gaspi, o el buenu de Nacho Méndez, que pa munchos nun valía y de xuru sería titular nesti equipu. Amás, creo que nun ye necesario dicir que la mayor versión d'esti ciclu en segunda foi a puerta zarrada y que lo tiremos pela borda el único partíu con públicu. Da qué pensar.

Taría bien prestoso ver al Molinón camudando'l chip y velo aplaudir a Iker cuando nun controla bien un balón fácil, cuando Bruno o Ferreres lo intenten y nun-yos sal, o cuando Conde falla un pase claru.

Nestos casos alcuérdome del debut de Alex Menéndez. ¿Vos acordáis d'esi gol al Espanyol nos últimos minutos que nos averó a la permanencia? ¿Y d'esi otru en Riazor a pase de Halilovic? Pues el so debut foi bien distintu: partíu de copa contra'l Mallorca. Gol en propia y asistencia a Nsue pa echanos del tornéu en 16os. Esi Molinón enxamás lu condenó. Dafechu, tuvo paciencia, y fixo d'él un xugador fiable y que dió momentos importantes como esi.

Si queremos que los nuestros quieran xugar nel Sporting, tenemos que facer que sepan que pueden equivocase ensin sentir que cada error va ser la última oportunidá.

Los queremos de Mareo. Sí.

Pero si los queremos de verdá, tendremos que querer tamién los sos errores, el so aprendizaxe y el tiempu que necesiten pa crecer. Porque apostar por Mareo nun ye solo cantar que los queremos.

Ye tener paciencia cuando toca tenela.

Puxa Sporting.