Ferreres cumple’l suañu de debutar col Sporting nel Molinón

Chris Ferreres cumplió esti domingu ún de los suaños que llevaba persiguiendo dende neñu: debutar col primer equipu del Real Sporting de Xixón.

Ferreres entró nel minutu 82 en sustitución d’Iosifov, viviendo los sos primeros minutos oficiales col primer equipu y faciéndolo nel estadiu onde siempres suañó xugar. Ú toos suañamos xugar davezu.

Esti debut tien un significáu especial pola trayectoria del futbolista y si facemos alcordanza podemos entender por qué.

Yera l’añu 2020, mes de payares, y dende Villarreal picaron a la puerta. Ferreres cumpliera los 16 años y yera ún de los delanteros más prometedores de Mareo. La oportunidá yera d’oru y camudó’l roxiblancu pol mariellu.

Nun sentó nada bien que marchara. Falóse de robu. Inclusu maltratu. Dende la casina de cristal sintiéronse traicionaos. Nun fai falta que digamos los que taben al mandu del nuesu equipu nesi tiempu, pero de traición sabíen bastante.

Dempués de 5 años, el futbolista acabó tornando al Sporting en xineru de 2025 y dende entós, foi completando’l so camín hasta recibir la llamada del primer equipu y disponer de la so primer oportunidá oficial.

«Ayer cumplí un sueño que llevo persiguiendo desde que era un niño»

Dempués del partíu, Ferreres publicó nes sos redes sociales un mensaxe nel que compartió les sos sensaciones tres cumplir el suañu de debutar col Sporting.

Ferreres destacó especialmente’l fechu de poder debutar nel Molinón, punxo en valor el trabayu realizáu durante los últimos años y recordó que detrás del so debut hai «munchos años de trabayu, esfuerzu, sacrificios y momentos nos que tocó siguir creyendo».

Mentanto a nosotros nos vendíen una traición resulta que’l xugador fala de momentos duros y sacrificiu…

En Xixón siempres tenemos esi problema de sentinos despechaos cuando un xugador quier crecer y marchar. Yera bono intentar camudalo.

Tamién yera bono dase cuenta de los xugadores que son sportinguistes. Nun ye lo mesmo vistir la camiseta que sentila. De xuru que a Gragera’l día d’ayeri-y dolió más que dalguna lesión. Porque hai coses que nun s'espliquen colos noventa minutos d’un partíu nin col escudu que lleves nel pechu. Hai xugadores que, anque marchen, siguen teniendo al Sporting dientro. Como dícia aquel: perdónalos, Gragera, que nun saben lo que faen.

Ferreres ayeri demostró precisamente eso dende l'otru llau: que marchar nun tien por qué significar dexar de sentir. Que se puede buscar el propiu camín, crecer fuera y, años dempués, tornar a casa.

Y quiciabes esa ye la lleición que nos dexa esti debut. Nun habría que querer menos a los nuestros porque un día decidan marchar pa crecer. Habría que facer que, cuando tengan la oportunidá de volver, quieran volver.

Ferreres volvió.

Y ayeri cumplió’l suañu.

Nel Molinón, cola roxiblanca y delantre de la so xente.

Puxa Sporting.