Cuando El Molinón queda lloñe

Hai munches coses que camuden cuando marches a vivir fuera d’Asturies: el verde de los praos, lo que ves pela ventana, los chigres, la manera de falar colos de alredor, les carreteres que yá nun conoces de memoria… Cuando tas lloñe, hasta un carbayón te parez dalguien cercano.

Tamién hai otres coses que deprendes a vivir d’un mou más intensu. Que faen el viaxe contigo. El Sporting ye una d’elles.

Ser del Sporting y tar fuera d’Asturies ye una forma de teletresportate a Xixón cada fin de selmana.  Y ye que, cuando lu ves pela televisión, yes capaz de sentite en casa per dos hores.

El Sporting ye muncho más de lo que la xente cree.

Pal que nun tenga la suerte de sabelo, los partíos del Sporting enxamás duren noventa minutos. Entamen en abriendo los güeyos pela mañana y finen dos o tres hores dempués de que l’árbitru pite’l final.

Yá nun vos digo nos derbis… Esos duren la selmana entera. O el mes. Hasta va un tiempu, dalgunu hasta facía cuentes colos derbis ganaos y yera como si'l derbi durare 4 ó 5 años. Agora perdieron esa costume.

Volviendo a lo nueso, cuando tas en Xixón, El Molinón forma parte d’un paisaxe que nun valores bastante. Nos díes de partíu les camisetes enllenen les sidreries, los que vieron al Brujo dan lleiciones de lo que necesita l’equipu mentanto tomen una botellina y, cuando entama’l partíu, la metá de la ciudá tien el corazón llatiendo nel mesmu sitiu.

Cuando vives lloñe, esa normalidá desapaez y ye entós cuando te das cuenta de tolo que significaba.

Por eso, los sábados de Sporting en Madrid -o en cualesquier sitiu que nun seya la tierrina-  siénteste bastante solu. El móvil conviértese, ensin lo querer, nel to mediu pa facer la previa. Lleer lo que se diz nos medios les hores antes ye casi una rutina.

Póneste la camiseta, baxes al mercáu del barriu y, dende un coche, glayen: “¡Aúpa Atleti!”.

Vivir nel barriu de Luis Aragonés nun ayuda. Equí vente de roxiblancu y creen que yes un sufridor de los suyos… Pero esta xente… A esta xente llenase-yos la boca falando de sufrir mientres sienten l’himnu la Champions los martes. Ye de rise. ¿Qué saben de sufrir?

Davezu daquién acierta y suelta:

-       ¿En qué categoría está El Gijón?”.

Nesos momentos nun sabes si tas en 1941 o si tas falando con dalguien que nun ve fútbol dende 1941.

Qué difícil ye ser del Sporting fuera d’Asturies.

Súfrese muncho esti equipu. Toos y toes lo sabemos, pero tando fuera paez que se sufre más. Amás, siempres trates de nun fallar a la to cita y facer coincidir la xubida col partíu. Mio má nin m'entruga cuando xubimos porque yá lo sabe. En xunetu nagües por conocer el calendariu y vas col almanaque na cartera tola temporada, por si, de sópitu, toca organizar el mes.

Sentir esti equipu dende la distancia traduzse en munchu tiempu invertíu y munchu dineru gastáu pa finar - casi siempres - morriendo na oriella en xunu.

Guapamente volveríemos a facelo milenta vegaes más.

Merez la pena.

A lo cabero de la temporada pasada, hubo qu’apoyar al Leganés - una y non más - pa que nun baxara a Primera RFEF y asina tener al Sporting per Madrid esta temporada. Y ye que nun se trata solo de velos xugar al pie de casa. La permanencia del Lega ye una escusa pa te faigan una visita.

Anque seyan dos díes, dan pa bastante más que pal fútbol.

Porque’l Sporting siempres ye muncho más que fútbol.

Y sí, dacuando necesitamos un partíu p’animanos a facer daqué. Pero, nel fondu, nun ye’l partiu lo que más nos presta.

Ye compartir n’andecha.

Un día en Llión, un viaxe a Pucela, una comida en Soria, una previa en Vitoria, una cerveza en Santander, un momentu de vida, una alcordanza pa siempres, un ascensu en Pelayo…

Ser del Sporting ye tamién una manera rara de querer al que lo vive contigo.

Ye volver a un llugar nel que duel munches vegaes, pero nel que les poques qu’esfrutes, nun tienen esplicación nin comparanza.

Porque’l Sporting y tolo que trai, ye muncho más que fútbol.

Ye esi abrazu tres un gol nel noventa.

Ye una nueva ilusión cada branu.

Ye’l mio güelu llevándome en cuellu a ver al guaḥe nos 2000'.

Yes tú vistiendo al to neñu nos díes de partíu.

Ye bona parte de la to vida.

Yes tú.

Y eso, si nun yes del Sporting, ye difícil d’entender.

 Puxa Sporting